Háskóli Íslands á Húsavík

Á heimasíðu Þekkingarseturs Þingeyinga er frétt um að ráðinn hefur verið doktorsmenntaður sérfræðingur á sviði sjávarspendýra til setursins. Hér er um að ræða samstarfsverkefni Háskóla Íslands og Þekkingarsetursins. Það eru mikil tímamót í því fólgin að Þekkingarsetrið skuli vera komið í samstarf við HÍ og að Rannsókna- og fræðasetur í sjávarspendýrafræðum skuli vera tekið til starfa á Húsavík.

Trúlega á enginn staður eins vel við, þegar kemur að rannsóknum á hvölum, og Húsavík. Þúsundir ferðamanna koma árlega til Húsavíkur m.a. til að fara í hvalaskoðun og á Hvalamiðstöðina. Húsvíkingar hafa þarna fundið sína sérstöðu og er rétt að tryggja þá sérstöðu í sessi. Það er meðal annars fólgið í því að byggja upp sérfræðiþekkingu og rannsóknir á hvalnum á Húsavík. Húsvíkingar eru á réttri braut.