Spor í rétta átt en allt of seint

Aðgerðir ríkisstjórnarinnar til að blása lífi í fasteigna- og fjármálamarkaðinn eru vissulega spor í rétta átt. Hins vegar eru flestir sammála því að hér sé of skammt gengið og aðgerðirnar hefðu þurft að líta dagsins ljós fyrir mörgum mánuðum. Ég hef á Alþingi ítrekað spurt félagsmálaráðherra út í stöðuna á húsnæðismarkaðnum og hvað ríkisstjórnin ætlaði sér að gera til að mæta grafalvarlegri stöðu á þeim markaði. Svörin hafa hins vegar verið á þann veg að ekki væri tímabært að grípa til aðgerða og reyndar var af svörunum að dæma að staðan á markaðnum væri ekki eins slæm og menn vildu vera láta.

En nú loksins hefur ríkisstjórnin ákveðið að grípa til aðgerða eftir mikinn þrýsting aðila sem þekkja vel til á húsnæðismarkaðnum. Hins vegar leita óhjákvæmilega á mann hugsanir um hvort að staðan væri ekki með öðrum hætti ef ríkisstjórnin hefði tekið þessar ákvarðanir fyrr. Því miður heyrast sögur um alvarlega stöðu margra fyrirtækja sem tengjast þessum markaði. Það hefði skipt miklu máli fyrir þau fyrirtæki að búa við ríkisstjórn sem væri ekki svona ofboðslega lengi að grípa til aðgerða á húsnæðismarkaðnum. Það verður seint sagt um núverandi stjórnvöld að þau séu snör í snúningum.