Tollfrjáls innflutningur

Ég var mjög ánægður að heyra í fréttum að fjármálaráðherra skuli hafa aukið svigrúm neytenda til að flytja vörur inn í landið, tollfrjálst. Fréttin var sú að nú mega ferðamenn hafa með sér vörur hingað til lands að verðgildi 65 þúsund íslenskra króna án þess að greiða toll af þeim en áður mátti einungis flytja inn fyrir 46 þúsund. Ég hugsaði með mér að nú væri ríkisstjórnin loksins að taka sér tak og standa við stóru orðin um bættan hag neytenda.

En þegar horft er til hækkunarinnar út frá gengi krónunnar horfir málið ekki eins við. Gengi íslensku krónunnar hefur verið í frjálsu falli síðustu misserin þannig að verðgildið hefur fallið um 35-40% gagnvart öðrum gjaldmiðlum. Þegar öllu er á botninn hvolft er því ekki um eins mikla hagsbót að ræða og ætla mætti.

Reyndar vekur það upp ákveðnar spurningar um framtakssemi ráðherrans að upphæð ótollskyldrar vöru skuli ekki hafa verið breytt á síðustu sex árum. Ég tel að ráðherrann hefði mátt ganga lengra og hækka þá upphæð sem ferðmenn mega koma með tollfrjálsa til landsins enn meir. Þannig fengi íslenska verslunin meira aðhald og þannig myndi samkeppnin aukast sem yrði okkur öllum til hagsbóta. Ég vona þess vegna að fjármálaráðherrann taki sér ekki önnur sex ár til að ákvarða næstu hækkun.

Annars eru sex ár í því samhengi ekki langur tími hjá Sjálfstæðisflokknum. Flokkurinn hefur haldið utan um fjármálaráðuneytið frá því ég var tólf ára gamall, í 17 ár samfellt, og mér sýnist hann ekkert á förum þaðan. Árangurinn í efnahagsstjórnuninni síðustu 12 mánuði, frá því Framsóknarflokkurinn gekk úr ríkisstjórn, er þó vægast sagt einstakur og vekur bjartsýni um að landsmenn sjái að þörf er á breytingum á landsstjórninni.

Svo er bara að sjá hvernig þingflokkur Samfylkingarinnar bregst við í næstu fréttatilkynningu sinni en eins og menn vita þá vill viðskiptaráðherra rýmka reglur um tollfrjálsan innflutning mjög. Skref fjármálaráðherrans hlýtur að vera hænufet á mælikvarða samráðherra hans í ríkisstjórninni.

(Greinin birtist einnig í 24 stundum í dag)